Ear lelok An mour bwe En pinmuur

Ilo Matu 20:22-27 Jesus ej kõnono kõn kõnaan ko an armej bwe ren utiej. Ej kab mõj an jinen Jemes im Jon kajjitõk ippãn Jesus elaññe lõmaro nejin re maroñ utiej ilo aelõñ eo An. Jesus ej ba bwe ro ri lal in re kõnaan bwe ren utiej, ak en jab ãindein ippãn Christian. Ren jerbal im karijer ñan armej. Innãm ilo 28 eoon, Jesus ej kwalok wan joñak kõn E make ke Ear kõttãik E.

Elmãn An kar kõttãik E? Jesus, Eo ear kõmanman men otemjej (Jn. 1:3), ear kõttãik E bwe En erom armej im eñtaan im mej kõn kõj!

Ear “lelok An mour bwe En pinmuur ñan ro re lõñ.”

Ta in “pinmuur”? Ilo eoon in, naan in ej juon naan me raar kajerbale ke raar wiaik juon ri kamakoko bwe ren kanemkwõj e.

Eita? Jej ri kamakoko ke? Aet, bwe ilo Jon 8:34, Jesus ear ba, “Jabdewõt eo ej kõmanman jerowiwi, e ri karijeran jerowiwi.”

Ilo bar juon wãween ba, ejjelok ad make maroñ in kanemkwõj kõj jãn kajoor an jerowiwi. Emõj jakõl kõj. Kwõ maroñ ke mour juon raan im jab jerowiwi ñan jidik? Jab illu, jab dike, jab jememe, jab utiej bõro?

Elõñ armej rej lõmnak bwe re maroñ bõk anjo ñe re kõnaan. Ak Anij ej ba je lotak ilo jerowiwi (Sam 51:5), ejjelok armej ej kõmman emman (Rm. 3:12), je jepel jãn Anij (Ais. 59:2), im je jab pukõt Anij (Rm. 3:11).

Juon ri kamakoko e jab maroñ make tumi chain ko an. Ej aikuj bwe bar juon en kanemkwõj e. Eñin men eo Jesus ear kõmmane. Meñe elap An utiej, Ear make kõttãik E (Pil. 2:8) bwe en kõllã onean kanemkwõj kõj. Jen kammoolol E wõt!

Onean jerowiwi mej. Onean jerowiwi e jab jerbal ñan Anij, e jab tiljek, e jab jar aolep Jabõt. Jet armej rej ba tõmak wõt im jab jerbal e nana im jowan. Bõtab Anij ej ba je jab maroñ kõmman jabdewõt jerbal ñan jipañ kowãnõk kõj. Jej ri nana.

Jerbal an Jesus e bwe! Ej wiaik kõj. Ej juon jerbal elap ñan lomooren armej, ak e jab jerbal ko ad, ej jerbal an Jesus. Im kõn ad mõnõnõ kõn jerbal eo An, je kõnaan jerbal ñan E. Ak ad jerbal ñan E ej kõnke emõj lomooren kõj, jab bwe En lomooren kõj.

Emõj wiaik eok ke? Emõj kanemkwõj eok jãn jerowiwi ke? E jab melelein kwõ ban bar jerowiwi, bwe toõn wõt ad pãd ioon lal in, jej jerowiwi. Ak e melelein bwe ewor am maroñ in bõk anjo, kab kwõ “jãmin itok ilo ekajet,” a kwaar “ilok jãn mej ñan lowan mour” (Jon 5:24).