Nejin wôn kwe?

Nejin wõn kwe? Ijab kajjitõk kõn etan jinõm ak jemam. Ij kajjitõk elaññe kwe nejin Anij ke jaab. Ejjab aolep armej nejin Anij, bwe Jijej ear ba ñan jet ri kabuñ ilo Jon 8:44 bwe rej nejin tepil, im 1 Jon 3:10 ej kõnono kõn ro rej nejin tepil. Jon 1:12 ej ba,

A ro raar bõk E, Ear lelok ñan er bwe ren erom nejin Anij, ñan ro rej lõke Etan.

Elmãn am maroñ erom nejin Anij?

1 Kwõj aikuj kile bwe kwe ri nana, im joñan am nana, ekkar bwe kwõn mej indeeo. Rom 3:23 Bwe otemjej rej jerowiwi, im rej likjab jãn aiboojoj an Anij. Kõn am nana, kwõ jepel jãn Anij (Ais. 59:2). Jerbal ko am remman rej ãinwõt juon nuknuk ettoon (Ais. 64:6). Kwõn jab ba, “Elaññe emman aõ mour, Anij enaaj bõk eõ.” Ejab emman am mour, bwe “jabdewõt eo enaaj kõjparok kien otemjej, a ej buñ ilo juon iaer, ewor ruõn kõn aolepeir” (Jemes 2:10). Emman ñe armej rej mare im jolok aer kadek im kabaatat, ak ewor rueir kõn jerowiwi ko jet rej kõmmani. Kwõj errã ippãn Anij bwe kwe juon ri nana ke?

2 Kwõj aikuj kõnaan oktak jãn am nana. Men in ej ukelok. Ejjelok emaroñ make oktak jãn nana ko an, ak kwõj aikuj buromõj kõn am nana im kõnaan oktak. Devid ear ba ilo Sam 32:5, “Iar kwalok ñan Eok aõ bõd, im aõ jerowiwi iar jab nooje....” Anij ejab maroñ lomoorem mae iien kwõj dike am nana im kõnaan oktak.

3 Kwõj aikuj tõmak bwe mej an Jijej wõt emaroñ karreoik eok jãn aolep bõd ko am. Ewor ruõm kõn jerowiwi ko kwar kõmmani, im eban jako ruõm kõn am oktak im jar im kajjioñ in mour juon mour emman. Am oktak, am buromõj, am jañ, im am jar reban jolok nana ko am. 1 Jon 1:7 ej ba “bõtõktõken Jijej Nejin ej karreoik kõj jãn jerowiwi otemjej.” Am jerbal im kijejeto ñan Anij reban karreoik eok (Epes. 2:8,9). Kwõn jab ba bwe kwõj lõke Jijej im elaññe kwõ tiljek kwõnaaj mour, bwe kõn am ba men in, kwõj lõke am tiljek. Rom 3:28 ej ba bwe Anij “ej kowãnõk armej kõn tõmak ejepel jãn jerbal ko an kien.” Kwõj aikuj lõke tokjãn mej an Jijej wõt im jab kobaik bar juon men ñan e. Elaññe kwõj errã ippãn Anij bwe kwe juon ri nana, im kwõj buromõj kake im kõnaan oktak, im elaññe kwõj lõke bwe mej an Jijej im men in wõt emaroñ kowãnõk eok, innãm kwõnaaj erom juon nejin Anij im bõk jurlok jerowiwi im mour indeeo (Jerbal 13:38,39; Jon 3:16). Juon ri kaki e jab maroñ jare eok bwe kwõn erom nejin Anij. Ak kwõ maroñ make jar jabdewõt jikin kwõj pãd ie, im lõke Naan ko an Jijej.

© David Utter

Laura Baptist Church, PO Box 1073, Majuro, MH 96960