Ãinwõt ad jelã, Lõktañur ear juon ri etto in aelõñ kein. Wõn ejab jelã bwebwenato eo kõn an kwalok juon wõjlã jãn pããk eo an im jipañ Jebro bwe en le maan jãn Tumor? Je ñak ñe Lõktañur ear mool in armej ke jab. Bõtab ejjelok emmanin bwebwenato in. Ekkã wõt an armej kajjitõk im ba, “Ri etto ro in aelõñ kein re pãd ia? Renaaj ke etal ñan hell ãinwõt ke raar jab roñ kõn Gospel?” Ta am lõmnak? Ekkãr ke bwe Anij en liaaklok ri etto ro ñan hell meñe raar jab roñ kõn Gospel? Jen lale ta eo Baibõl ej ba kõn men in.
1. Aolep armej jãn Adam lik tak rej ri jerowiwi. Rom 3:23 Bwe otemjej raar jerowiwi... Ri etto ro in aelõñ kein raar kokkure kien Anij. Kõn men in rej aikuj mej indeeo. Rom 6:23 Bwe onean jerowiwi mej...
2. Ri etto ro in Majõl raar jelã bwe raar jerowiwi. Rom 2:15 Bwe rej kwalok jerbal an kien, eo emõj jeje ilo burueir, im aer bõklikut ej kõnnaan ippãn, im lõmnak ko aer, juon innãm bar juon, rej kinaaklok ak kõtlok er.
3. Ri etto ro in Majõl raar maroñ in jelã kõn Anij. Rom 1:20 Bwe men ko An im je ban loi e alikkar jãn jinoin lal, bwe re jelã kajjier kõn men ko Ear kõmmani, aaet, An kajoor indeeo im An Anij wõt; bwe ren jab maroñ in uwaak. Ri etto ro ren kar kallimjek menin kõmanman ko an Anij im kile bwe “Enaaj lelok jinekjej ñan ro rej kapukõt E” (Hibru 11:6).
4. Pepe ko an Anij re jimwe im wãnõk. Lale mak jemloken Rom 1:20. Ej ba, “Ren jab maroñ in uwaak.” Ejjelok ri etto in Majõl emaroñ naruõn Anij kõn an jab roñ Gospel. Ej melele in bwe Anij ear kõmman ial ñan er ak raar ilok jãn e. Emõj an lelok chance ñan er ak raar abwin bõke. Jemaroñ jelã juon men, ijo jabdewõt im ri etto ro rej pãd ie kiiõ, ekkar bwe ren pãd ie, kõnke Anij ewãnõk im pepe ko an re jejjet im jimwe.
Kiiõ juon aõ kajjitõk. Ekkar bwe kwõn buromõj kaki ri etto ro? Kwõ maroñ uwaak im ba, “Raar jab roñ Gospel. Ejab fair men in.” Ak kwe? Emõj ke am roñ Gospel? Innãm kwar kõmman ta? Ãinwõt elap am lõmnak e ri etto ro, ak kwar jab eoroñ Gospel me ej walok ñan eok aolep raan. Wõn ejab ba bwe ewor jiddik ankilriab ilo kajjitõk in “Ri etto ro renaaj ke mour?” Ilo waan joñak, juon ri kabaatat ej illu kõnke armej ro ilo lal ko re marok re ñak bwe e paijin jikka. Kõn aer jaje kajen balle rejab maroñ read kakõl eo me ej walok iion kilen package in jikka im ba, “Jikka ej bõktok cancer.” Ri kabaatat ej ba, “Elap aõ buromõj kaki armej rein kõnke ejjelok ear ba ñan er bwe enana jikka.” Ak toõn wõt an ri kabaatat in kõnono rõt in, ej jijet im kabaatat.
Ewor aõ tõmak bwe ejjelok oktak wãween in jãn kain eo me ej kwalok an buromõj kõn ri etto ro in Majõl, ak e make ej abwin lõke Jijej. Ñe kwõnaaj jutak imaan Anij, kwõ ban lelok uwaak kõn Lõktañur. Kwõnaaj lelok uwaak kõn kwe make. Kwõ pojak ke in ioon Anij? Kwõ jelã ke bwe emõj kawãnõk eok imaan mejan Anij? Kwõ jelã ke kiiõ wõt bwe kwõ naaj mour indeeo ilañ ippãn Anij?
Ãinwõt ri etto ro, kwar lotak ilo jerowiwi.
Job 25:4 ekõjkan an maroñ erreo, eo ej lotak jãn kõrã?
Ãinwõt ri etto ro, emõj am rupi kien Anij tausen katin.
Rom 3:23 Bwe otemjej raar jerowiwi...
Rom 7:18 I jelã bwe ilo ña... emman ejab jokwe.
Ãinwõt ri etto ro, emõj kwalok ñan eok juon ial ñan mour.
Jon 14:6 Ña ial im mool im mour, ejjelok armej enaaj itok ñan Jema elaññe jab kõn eõ.
Ãinwõt ri etto ro, kwõ naaj aikuj lelok uwaak ñan Anij kõn wãween am mour.
Hibru 9:27 Im bwe emõj likut ñan armej bwe ren mej im tokãlik ej itok ekajet eo.
Ñe kwõj tõmak wõt Kuraij ñan kawãnõk eok, innãm Enaaj lomooren eok ñan indeeo. Jon 5:24 Eo ej roñjake Aõ in Naan im lõke Eo ear jilkintok Eõ, an mour indeeo, im ejãmin itok ilo ekajet, a ear ilok jãn mej ñan lowaan mour. Kwõn jab madjake ri etto ro. Rainin ej raan in kããlõt ñan kwe. Kwõn lõke Jijej im e wõt ñan kawãnõk eok. Rom 4:5 A ñan eo ejab jerbal a ej lõke eo ej kawãnõk ri jerowiwi, watõk an tõmak ãinwõt wãnõk.
© Eric Fisher, 2000 Laura Baptist Church, PO Box 1073, Majuro, MH 96960