Jen jab kejoole lomoor eo elap an Anij!

Hibru 2:3 ej ba, Ekõjkãn jen ko, elaññe jej kejoole lomoor elap ãinwõt in?

Ewor jet armej im rej lõmnak enaaj emman ippaer ilo jemloken meñe re jab bõk lomoor kiiõ. Bõlen men in ej kõn an jet rü kaki kwalok ilo iien kallib an jet ri nana im ba “armej in e moot ñan kakkije” im “je jelã Anij ej bõk e kiiõ.” E nana kwalok rõt in, bwe ej kõmman bwe armej ren lõmnak, “Ìinwõt juon elaññe I jab jolok aõ bõd ippãn Anij kiiõ. Enaaj emman ippa ilo jemloken.”

Ta eo enaaj walok ñan juon eo e jab bõk lomoor ilo mour in? Emman an eoon in uwaak kajjitõk in.

Eoon in ej kajerbal naan in, “kejoole.” Naan in melelein: ewor juon men emman jen kar bõke, ak jaar jab.

Ìindein lomoor. Ej juon men emman. Meñe jaar lotak ilo jerowiwi, im jaar kokkure kien ko an Anij, im ekkar bwe jen mej indeeo, Anij ear jouj ñan kõj.

Lomoor ej men in jouj.

Anij ear make letok juon wãween lomoor. Ear jab aikuj kõmman men in. E maroñ kar jolok kõj aolep kõn ad bõt im jumae E. Ear man armej ilo tõr eo an Noa, Ear man armej in Sodom, im ekkar bwe En man kõj.

Bõtab, Ear kõmman juon wãween lomoor eo ej An make jerbal. Ear ejjelok an Noa maroñ in lomooren e jãn ibwijleplep eo, ak Anij ear lelok juon wãween. Ear ejjelok maroñ an Israel ko jãn Ijipt, ak Anij ear onake er. Ke Ebream ear pojak in katok kake Aisak, Anij ear kõmman wãween bwe en jab mej Aisak Lomoor ej jerbal an Anij wõt.

Lomoor ej jerbal an Anij, im An wõt.

Kõn ad mej ilo jerowiwi im jepel jãn Anij, ad büromõj, ad jar, ad jerbal ñan Anij, im ad jolok nana ko ad re ban jipañ lomooren kõj.

Rom 4:5 ej ba, A ñan eo e jab jerbal a ej lõke Eo ej kowãnõk ri jerowiwi, watõk an tõmak ãinwõt wãnõk. Rom 8:8 ej ba, ro rej pãd ilo kanniõk re jab maroñ in kabuñbüruen Anij. Ilo Jon 6:44, Jisõs ej ba, Ejjelok armej e maroñ itok ñan ippa elaññe Jema eo Ear jilkintok Eõ E jab ipertok e.

Mae iien Anij, ilo An jouj, ej kõkããl eok, ejjelok juon men kwõ maroñ kõmmane ñan kabuñbüruen Anij. Kwõj pãd wõt iumwin illu an Anij. Rom 1:18 Bwe illu an Anij e walok jãn lañ nae jerowiwi otemjej im nana an armej. Hibru 10:31 Men in lõlñoñ, po ilo pein Anij e mour.

Lomoor eo an Anij e kanooj emman, bwe ej men in jouj wõt. Kõn men in, elap an nana ñe jej kejoole. Bõd eo ad elap ej bwe jej kajekdoon jouj an Anij. Rom 2:4,5 Jej ukõt An emman kõn nana.

Kab, eoon in ej kwalok ta eo ej walok ñan ro rej kejoole lomoor in emman. Ilo Hib. 2:2,3 ej ba, Bwe elaññe naan ko enjel raar ba re pen wõt, im e jimwe an na oneair kõn kõtrãe im kipiliia otemjej; ekõjkan jen ko...?

Ej kõnono kõn enjel ro raar jipañ Setan ilo jinoin ke ear jumae Anij. Anij ear jouj ñan er ke? Jaab. Ear jolok er kõn aer jab pokake. Jud 6 ej ba Anij ej kõjparok er ilo jeen im marok ñan raan in ekajet eo.

E jimwe ke an Anij kokkure er? Aet, bwe raar jumae E. E jimwe ke an Anij kokkure eok elaññe kwõj kejoole lomoor eo An im wanmaanlok ilo am nana? Aet. Kwõ ban ko jãn ekajet eo.

Jet armej rej ba, “mõttan jiddik inaaj ukelok.” Bõtab, kõn aer ba men in, rej ba ñan Anij kiiõ, “Jaab, I ban pokake Eok im ukelok kiiõ.” Elap an nana men in.

Nana eo elaptata ej bwe armej rej kejoole jouj an Anij im naan in jiroñ an Anij. Re kõnaan pãd wõt ilo aer jerowiwi im jumae Anij.

Ewi wãween bwe jen eoroñ Anij im jab kejoole? Jen ukelok – melelein jen kile bwe joñan ad nana, ekkar bwe jen mej indeeo. Jen kile bwe ejjelok emman ilo kõj, im kõn men in, je jab maroñ lõke tokjãn jerbal ko ad. Jen büromõj kõn ad nana nae Anij im oktak.

Bõtab, jen jab lõke ad oktak! Ad oktak e ban lomooren kõj, bwe jenaaj likjab wõt. Jen lõke bwe wãnõk an Jisõs – An pokake Anij im An mej kõn nana ko ad – ej lomooren kõj. Pil. 3:9 Anij ej kowãnõk armej kõn jerbal an Kraij (Rom 3:24,25), jab kõn jerbal ko aer.

Jen jab kejoole lomoor eo. Jen kwalok ad nana im ban, im lõke tokjãn jerbal ko an Kraij, bwe men in wõt e maroñ lomooren kõj.

© 2001 David Utter

Laura Baptist Church, PO Box 746, Majuro, MH 96960