Ekkar ke bwe armej ren eñtaan indeeo?

Mool ke bwe armej renaaj eñtaan indeeo?

Reban baj bwil im jako ke? Ekwe, Anij ej ba renaaj eñtaan indeeo. 2 Tess. 1:9 ej ba “Er renaaj eñtaan ilo kokkure indeeo im jako jãn mejen Irooj.”

Im Rev. 14:11 ej ba “Im baat in eñtaan eo aer ej wanlõñlok indeeo im indeeo, im ejjelok kakkije ippaer raan ak boñ.” Elaññe Ej likut bwe armej ren eñtaan indeeo, e jimwe, bwe ãindein men otemjej Anij ej kõmmani.

Anij e maroñ ke kõmman juon kain kijeek eo e jab tile juon men bwe en bwil im jako? Aet! Ke Moses ear lale wõjke eo e urur ilo ãne jemaden, unin an bwilõñ ej kõn an jab bwil im jako.

#1 Ekkar kõnke Eo jej jerowiwi nae E elap! Elaññe kwõj kanejneje juon ri kadek, e nana. Ak elaññe kwõj kanejneje iroojlaplap eo am, e kanooj lap an nana! Anij e make wõt emman. Ej yokwe kõj im ejjelok joñan. Kab, Ear kõmanman kõj im E ad Irooj! Bõtab, jãn raan ñan raan armej rej kajekdoon E im kõmman ankilaer wõt. Aiseia 53:6 “Kõj otemjej ãinwõt sip ko jaar jebwãbwe; jar jeorlok jabdewõt iad ñan ial ko an.”

#2 Ekkar kõnke jerowiwi ko ad relap! E alikkar bwe aolep armej rej jerowiwi. Ìinwõt kar Adam im Iv, jej kããlõt ankilad im jab ankilaan Anij. Rom 3:11 ej ba, “Ejjelok juon ej kapukõt Anij.”

Im unin elap an nana men in ej bwe elap an Anij jouj ñan kõj. Ej letok mour im menono im ãjmuur im iien ko remman ippãn ro mõttad. Ej letok dãt im wõt, mõñã im dãn. Ej letok kajoor im men ko re aiboojoj. Elõñ men ko remman emõj an Anij litok. Im unin An litok ej bwe jen kammoolol E, nõbar E, im kaiboojoj E kõn ad mour ñan E.

Bõtab, jej bõk men ko remman Ej litok im kajerbali ñan kajejjet kõnaan ko an ãnbwinnõd. Elaññe kwar jouj ñan juon armej im lelok elõñ men ñan e, ak ear kajekdoon eok, kwõnaaj kar illu. Rom 2:4 ej ba, “Ak kwõj kajekdoon mweiuk in jouj eo An, kab An meanwõd im jab bõro kadu, im jaje bwe jouj eo an Anij ej tõl lok eok ñan ukelok ke?” Kab, ñe jej jerowiwi nae Anij, jej mõnõnõ ilo ad jerowiwi! Lale mõk Aiseia 65:12:

Inaaj likut kom dien mej kõn jãje, im kom otemjej naaj badikdik ñan kokkure; kõnke kom ar jab uwaak Aõ kur; ke Iar kõnono, kom ar jab eoroñ; a kom ar kõmman men eo e nana ilo meja, im kããlõt men eo I jab mõnõnõ kake.

Bõtab meñe Anij enaaj kajeik ro rej kajekdoon E, E jab kõnaan bwe jabdewõt en jako, ak E kõnaan bwe aolep ren ukelok (2 Piter 3:9).

Elmãn ukelok? Ukelok e jab melelein kajjioñ oktak. Kwõ bane. Ukelok melelein kile joñan an nana, im buromõj kõn am kar jerowiwi nae Anij – Eo elap An yokwe eok. Im meñe emman ukelok, e jab bwe. Ta eo enaaj jolok ruõm imaan Anij? Am jañ im buromõj ban. Rom 3:24,25 ej ba “Kowãnõk er im ejjelok onean, ilo An jouj, kõn men in wiaik eo ej ilo Kuraij Jijej: Eo Anij ear kwalok E bwe En kein medek, kõn tõmak ilo bõtõktõken....” Kwõn jab tõmak ilo am oktak, ilo jar an juon ru kaki, ak ilo am jerbal ñan Anij. Men kein re ban lomoorem. Mej an Jijej ej kõllã onean aolep jerowiwi ko am - jerowiwi ko emõj am kõmmani im jerowiwi ko kwõnaaj kõmmani ilju im jeklaaj. Ekkar bwe armej ren mej im eñtaan indeeo, ak kammoolol Anij, ewor jeorlok bõd kõn bõtõktõken Jijej ñan ro rej kõttãik er!