Enana juon armej kõn an kabaatat ke?
Elõñ armej im elõñ kabuñ rej ba bwe juon armej e jab maroñ Christian elaññe ej kõbaatat. Mool ke?
Rej ba men in kõnke rej ba bwe kõbaatat ej jerowiwi, im Anij e ban bõk juon armej elaññe ej jerowiwi.
Bõtab, ewor jet aõ kajjitõk: elaññe juon armej e jab kõbaatat, e maroñ wor bar jet an jerowiwi ke? Im, ewor ke juon armej me ejjelok an jerowiwi ñan jidik? Etke kabuñ ko rej kããlõt kõbaatat im kadek, ak re jab kõnono kõn dike im utiej bõro?
I kõnaan kaalikkar juon men: e jab emman kõbaatat, bwe ej kõmman cancer. Bubu ear mej kõn cancer kõn an kar kõbaatat.
Bõtab, jikkar e jab kajerowiwik juon armej. Jekdoon elaññe juon armej ej kõbaatat ke jab, e juon ri jerowiwi elap imaan Anij. Jej aolep ri jerowiwi im jepel jãn Anij (Ais. 59:2).
Elaññe juon armej e jab maroñ Christian kõn an kõbaatat, innãm juon eo ej dike, ak jab jouj, ak utiej büruon e jab maroñ Christian.
Mool ke bwe juon armej e maroñ Christian meñe e jañin weeppan, im ewor jerowiwi ilo an mour? Aet, bwe 1) ejjelok armej e jab jerowiwi (1 Jon 1:10). 2) Anij e jab jiroñ kõj bwe jen karreoik kõj; Ej jiroñ kõj bwe jen oktak ñan E (Jerbal 17:30) im lõke wãnõk im jerbal ko an Jisõs (2 Korint 5:21). 3) Jisõs ej bõk eddo kõn nana ko ad, im Ej letok wãnõk eo An (1 Piter 2:24).
Ñe Anij ej lomooren juon armej, Ej lelok juon bõro ekããl bwe armej eo en jab kõnaan kõmman nana. Kõn an pãd wõt ilo kanniõk, enaaj jerowiwi jet iien, ak ejjelok liaaklok ñan e kiiõ kõn an pãd ilo Christ (Rom 8:1). Je jab erom Christian kõn ad jolok aolep nana jãn ad mour. Je bane men in. Jej erom Kürjin kõn ad kõnaan oktak jãn ad jumae Anij im kõn ad lõke bwe jerbal an Christ ej kowãnõk kõj.
Ilo Mark 7:15, Jisõs ear ba, Ejjelok men eo ilikin armej, men eo ej deloñ ilowan, ej maroñ in kanananaik e; a men ko rej waloktok jãn ilowan, men kein rej kananaik e.
Juon armej e jab erom juon ri jerowiwi kõn an kõbaatat. Ej kõbaatat kõnke ej juon ri jerowiwi. Jorrããn eo ad ej büruõd, bwe jãn büruõd ej walok nana ko ad. Büruõd re ban erreo kõn ad jolok jikka.
Büruõd renaaj erreo kõn ad lõke tokjãn jerbal ko an Jijej. Bõtõktõken Jisõs Nejin ej karreoik kõj jãn jerowiwi otemjej. 1 Jon 1:7 Jerbal ko ad remman re jab kowãnõk kõj. Jen kajjioñ oktak jãn nana, bõtab jen jab lõke ad oktak, bwe e ban bwe. Emman jolok jikka, ak je ban wãnõk kake. Jerbal ko an Jisõs wõt re maroñ kowãnõk kõj.