Juon wõt men ej bõbrae eõ jãn aõ ukelok!
Emõj ke am roñ an juon armej ba naan kein? Emõj ke am ba naan kein? Ilo aõ katak Baibõl ippãn armej jãn wiik ñan wiik, elõñ rej kajerbal ejja naan kein wõt ilo aer kamelele kõn unin aer jañin ukelok. Elõñ rej ba mõttan wõt jolok jikka, ak mõttan wõt jolok kadek innãm renaaj ukelok. Ta mool ke juon wõt men ej dãpij juon armej jãn an ukelok? Ewor ruo lõmnak ko re bõd ippãn armej eo me ej ba bwe juon wõt men ej dãpij e, ak bõbrae e, jãn an ukelok.
1. E lukkuun bõd an lõmnak kõn joñan an nana. Baibõl ej jiroñ kõj bwe kõj aolep ri nana. Sam 14:2,3 Jeova ear reitok jãn lañ ko ñan ro nejin armej, bwe En lo elaññe jabdewõt eo e mãlõtlõt, im pukot Anij. Er otemjej re bõd, rej jimor im puwal, ejjelok juon ej kõmman emman... Wõn ej kõnnaan ilo eoon kein? Ejimwe! Jeova Anij. Im ej kõnono kõn wõn? Ejab kõnono kõn ri kadek, ri lõñ, im armej ro rettoon tata ilo lal in. Ej kõnono kõn aolep armej. Ej kõnono kõn kwe im ña. Ta kwõ bane men in ke? Bwe? Anij jelã jãn kwe. Im ej ba bwe kwe juon eo ettoon. Ej ba bwe ña ij juon eo ettoon! Job 15:14-16 Ta armej bwe en kwõjarjar im eo e lotak jãn kõrã bwe en wãnõk? Lo, Ejab lõke ro An re kwõjarjar; aaet, lañ ko re jab erreo imaan Mejãn! E nañin diklok juon ej men in jõjjõik im ettoon. Juon armej ej idaak jab wãnõk ãinwõt dãn! Ilo mool ejab juon wõt men im ej bõbrae jabdewõt armej jãn an ukelok. Million million men rej bõbrae kõj, im ejjelok men je maroñ in kõmmane ñan karreoik kõj jãn men kein!
2. E lukkuun bõd an lõmnak kõn ta eo en kõmmane ñan jibadek lok aelõñ an Anij. Elaññe kwõj tõmak bwe juon wõt men ej bõbrae yuk jãn am ukelok, innãm kwõj tõmak bwe kwõ nañin wãnõk. Kwõj tõmak bwe emõj am karreoik yuk make, im mõttan juon wõt lippijinjin in jerowiwi im kwõj aikuj in kajeer e. Elaññe kwõj tõmak ãindein, innãm kwõj lõmnak bwe ewor juon men kwõn kõmmane ñan kawãnõk yuk. Kwõj tõmak bwe ewor tokjãn jerbal ko am ñan jibadek lok aelõñ an Anij.
Lomoor ej jerbal wõt an Anij. Jej wãnõk kõn lõke Jijej Küraij e jepel jãn jabdewõt men jej kõmmane. Rom 3:21 A kiiõ juon wãnõk an Anij emõj kwalok e im jepel jãn kien... Elaññe wãnõk e jepel jãn aõ tiljek kake jerbal in kien, innãm inaaj wãnõk kõn ta? Rom 3:22 Aaet, wãnõk an Anij, eo kõn tõmak Jijej Küraij ñan ro otemjej rej lõke E. Ejab juon wõt men im ej bõbrae yuk. Ejjelok juon men im kwõ maroñ jolok e ñan karreoik yuk! Rom 3:24 Kawãnõk er im ejjelok onean, ilo An jouj kõn men in wiaik eo ej ilo Küraij.