Jerbal Elap an Jetõb Kwõjarjar

Kwõj ke tõmak bwe Jetõb Kwõjarjar ej jerbal kiiõ ilo mour ne am? Elaññe kwar ba aaet, innãm ewi wãween An jerbal? Emõj ke am kõnono kõn lo ko? Emõj ke am okjak? Emõj ke am eñjake juon kajoor, ke ta? Jijej ear jilkin tok Jetõb Kwõjarjar bwe En kõmman juon jerbal elap ilo mour ne am. ˜okta jãn an Jijej wan lõñlok ñan lañ ear jiroñ ro ri kalooran bwe enaaj kar jilkin tok juon Ri Kaenõmman. Elap an emman jerbal rõt in ippãd. Wõn ejab kõnaan bwe en aenõmman mour eo an? Bõtab ewor bar juon jerbal elap me Jetõb Kwõjarjar e aikuj kõmmane ilo mour ne am. Ilo mool eban walok aenõmman ilo mour ne am mae iien etõprak jerbal in juon. Ewi jerbal eo?

Jon 16:8 Im ñe Ej itok, Enaaj naruon lal kõn jerowiwi, im kõn kwõjarjar, im kõn ekajet.

Eoon in ej jiroñ kõj bwe Jetõb Kwõjarjar ej juon Ri Kamool. Kwar ke lo naan in naruõn. Ej melele in “kamool bwe kwõ bõd.” Jerbal eo juon an Jetõb Kwõjarjar ej bwe en kamool ñan eok bwe kwõ bõd. Eoon in ej kwalok jilu men im Jetõb ej kamool ñan eok, ak naruõm, kaki.

1. Ej naruõn eok kõn jerowiwi. Ilo bar juon wãween ba, ej kamool ñan eok bwe kwe juon ri nana. Emõj ke am kile joñan am nana? Kwar lotak ilo jerowiwi. Sam 51:1 Ilo jerowiwi jinõ e ar ettaik eõ. Buruõd kajjojo re nana. Jeremaia 17:9 Bõro ejelã mon jãn men otemjej im ewor an nañinmej re ban kemoure. Jerbal ko am remman rej ettoon imaan mejan Anij. Aisiea 64:6 Men in wãnõk ko am rej ãinwõt juon nuknuk e bwidejdej. Ejjelok kajjitõk bwe kwe juon ri nana. Jetõb Kwõjarjar ejelã aolep lõmnak im kõmman ko am. Ekõnaan kamool ñan eok bwe kwe juon ri jerowiwi elap.

2. Ej naruõn lal kõn ekajet. Enañin aolep armej rej errã bwe elõñ aer jerowiwi. Wõn ejab jelã eoon in me ej ba, “Ejjelok ruwãnõk, ejjelok juon”? Bõtab emõj ke am kile bwe jerowiwi ne am enaaj bõklok eok ñan jikin eñtaan ñan indeeo? Rom 6:23 Bwe onãn jerowiwi mej. Bõlen kwõnaaj ba, “Emõj aõ jerowiwi, ak ña I jab lukkuun nana.” Lomnak mõk kõn men in- Adam ear lia kõn jete jerowiwi? 1000? 100? 50? Jaab. Ear mej kõn an kõmman juon wõt jerowiwi. Jete jerowiwi emõj am kõmmani? Ñe ejab dik jãn juon, innãm kwõj lia ñan Hell. Bõlen kwõnaaj ba, “Emõj aõ ukelok, im ñe emman aõ tiljek inaaj mour indeeo.” Eban kõnke e too late. Kwõj lia kadede. Jon 16:9 Kõn ekajet bwe ear ekajet irooj in lal in. Wõn ej irooj in lal in? Jetan. Eoon in ej ba bwe emõj an Anij ekajet Jetan kadede. Elaññe emõj an Jijej ekajet Jetan, ej melele in bwe emõj an ekajete aolep ri kalooran. Elaññe emõj am jerowiwi innãm kwe ri kalooran Jetan. Emaroñ eddo naan in ippãm, ak Jetõb Kwõjarjar eo e kõnaan kamool ñan eok bwe e mool. Jon 3:18 Emõj ekajet eo ejab lõke Eõ.

3. Ej naruõn lal kõn kwõjarjar. Jon 16:10 Kõn kwõjarjar (ak wãnõk) bwe Ij ilok ñan Jema. An Jijej ilok ñan Jeman ej kamool bwe E Ri Lomoor eo. Kwõj ke tõmak bwe wãnõk ej ilo Jijej wõt? Kwõj tõmak wõt Kuraij ñan kawãnõk eok im lomooren eok ñan indeeo ke? Ñe ejab innãm kwõj jumae jerbal an Jetõb ñan naruõm kõn kwõjarjar. Bõlen kwõnaaj ba, “Ña ij lõke Jijej.” Baj ke kwõj tõmak bwe kwõnaaj mour ilañ ñe emman am jerbal. Galetia 5:4 Kom jepel jãn Kuraij jabdewõt iami, kom kõnaan kawãnõk kom ilo kien; kom ar buñ lok jãn jouj. Jetõb ekõnaan kamool ñan eok bwe Jijej wõt ej kawãnõk eok ejepel jãn jabdewõt men kwõj kõmmane. 2 Korint 5:21 Eo ear jab jelã jerowiwi, Ear kõmman e jerowiwi kõn kõj, bwe jen erom wãnõk an Anij ilo E.

Jetõb Kwõjarjar ej Ri Kamool eo. Jerbal eo An kiiõ ilo mour ne am ej bwe en kamool ñan eok bwe jilu men remool. Juon- bwe kwe juon ri jerowiwi elap. Ruo- bwe kwõnaaj ekajet kõn jerowiwi ko am. Jilu- Jijej Kuraij wõt emaroñ kawãnõk eok. Elaññe kwar jañin jelã men kein jilu innãm kwõjab pojak ñan ukelok. Kwõn kõtlok bwe Jetõb Kwõjarjar en kameleleik eok kõn men kein jilu. Ñe etõprak, innãm Jetõb Kwõjarjar enaaj erom juon Ri Kaenõmman ñan kwe. Rom 5:1 Innãm bwe emõj kawãnõk kõj kõn tõmak, eor aenõmman ippãd ñan Anij kõn ad Irooj Jijej Kuraij.

© Eric Fisher, 2000.

Laura Baptist Church, PO Box 1073, Majuro, MH 96960