Jej aikuj mare bwe jen Christian ke?
Juon eo ej koba e maroñ Christian ke? Elõñ ilo aelõñ in rej ba jab.
Mokta, jen lõmnak kõn unin an armej lõmnak bwe re ban Christian ke rej koba wõt. Rej ba, “ak armej eo ej koba e jab erreo! Ettoon jikin babu eo an!” Mool men in. E jab erreo im e jab emman ñe ruo armej re jañin mare rej kepaak doon. Bible ej ba, “Kwõn jab lõñ.” Mool bwe koba ej jerowiwi, ak mool ke bwe armej rej aikuj jolok jerowiwi in (im mare) bwe ren Christian?
Elaññe jej aikuj jolok ad lõñ (koba), etke je jab aikuj jolok ad dike, ad utiej bõro, im ad riab barãinwõt? Ta eo jej aikuj kõmmane bwe jen Christian? Jej aikuj jolok aolep jerowiwi ke? Ewor ke juon armej eo e maroñ jolok aolep jerowiwi ko an? Ejjelok. 1 Jon 1:8 ej ba bwe je riab elaññe jej ba ejjelok jerowiwi ipped.
Anij e jab jiroñ kõj bwe jen jolok aolep nana jãn ad mour bwe jen Christian. E jelã je bane. Ej jiroñ kõj bwe jen ukelok: Lk 13:3. Ukelok melelein I kõnaan oktak jãn aõ jerowiwi. I bane oktak jãn aolep, ak I kõnaan, bwe kiiõ ij lo bwe ij jumae Anij kõn aõ nana.
Je bane oktak kõnke jej ri jerowiwi. Eñin unin an Anij aikuj kõkããl kõj. Ñe Ej lomooren kõj, Ej letok maroñ in bõk anjo. Je ban weeppan ilo lal in, ak ro im Anij ear lomooren er re maroñ bõk anjo ion nana ko aer. Elaññe juon armej e kõnaan oktak jãn an jerowiwi, enaaj alikkar ilo an mour. Enaaj kajjioñ etal jãn nana ko an.
Ak ta eo jenaaj ba kõn juon kõrã eo ej kile an nana im ban, im ej tõmak bwe mej an Jesus wõt e maroñ lomooren e, ak kõrã in ej koba? Elõñ nejeiro leo ippãn, ak leo ej abwin mare e. Melelein bwe kõrã eo e jab maroñ Christian ke? Kõrã eo e maroñ erom juon Christian. Ej ukelok – e kõnaan oktak jãn an nana – ak leo ej abwin mare e.
Unin an armej lõmnak e ban Christian ej kõnke rej lõmnak bwe lomoor ej ekkar ñan aer rreo. Ak e jab. Jesus ej bõk eddo kõn aolep jerowiwi ko ad (1 Pt. 2:24). Unin ad Christian e jab kõn ad jolok ad nana, ak ej kõn an Jesus kõllã onean ad nana.
Ilo Jon 4:6-42, Jesus ear bwebwenato ippãn juon kõrã eo ear mare im jepel 5 katen, im leo #6 ear koba ippãn. Ak Jesus ear jab ba en rool in mare mokta. Lien ear lõke Jesus, im ear kwalok kõn Jesus ñan elõñ armej ilo jikinkwelok eo. 39 eoon ej ba bwe elõñ raar tõmak Jesus kõn naan ko an kõrã in.
Elaññe juon armej ej koba im e kõnaan bõk lomoor, enaaj kõnaan mare. Ak an mare e jab juon ian men ko ej kowãnõk e. Rom 3:24 ej ba bwe Anij ej kowãnõk armej kõn men in wiaik eo ej ilo Christ Jesus.