Enaaj ineklok jerowiwi ko aer
Aiseia 53 ej juon jebta emman eo ej kõnono kõn Jesus. Meñe ej ilo Kallimur Mokta, ej kwalok kõn mour im jerbal an Christ. Lalem eoon ej kwalok unin an mej Jesus. Ej ba, “A emõj wãkare E kõn jerowiwi ko ad, im kakinejnej E kõn bõd ko ad.” Unin an Jesus eñtaan im mej ej kõn nana ko ad. Ear pinej jenkwad. Men in e kabwilõñlõñ.
Jen ba bwe juon ri kadek e nana e kalbuuj. Kwõ naaj mõnõnõ in bõk kaje eo an bwe en anemkwõj ke?
Ãindein men eo Jesus ear kõmmane. Ear jab mej kõn an make nana, bwe ejjelok An nana. 2 Korint 5:21 ej ba, “Eo ear jab jelã jerowiwi, Ear kõmman E jerowiwi kõn kõj, bwe jen erom wãnõk in Anij ilo E.”
Elaññe jerbal ko aõ remman re maroñ jolok ruõ kõn aõ nana, etke Christ ear aikuj in mej kõn eõ? Uwaak eo ej bwe jerbal ko aõ remman re jab maroñ jolok ruõ. Onean jerowiwi ej mej.
Aiseia 53:6 ej ba, “Kõj otemjej ãinwõt sip jaar jebwãbwe; jaar jeorlok jabdewõt iad ñan ial ko an.” Anij ej kwalok ial eo emman im jimwe, ak je jab kõnaan ial eo An.
Je kõnaan kajejjet mõm in kanniõk; je kõnaan kõnõbar im dike. Je kõnaan alwõj im kõnono kõn men ko rettoon. Jesus ear jab pukõt An make buñbuñ. Meñe ejjelok An bõd, ear mõnõnõ in mej kõn kõj. Aiseia 53:11 ej ba “Enaaj lo tokjãn eñtaan eo An, im naaj jokwane.”
Wõn enaaj loe im jokwane? Anij. Ke Ej lo bwe emõj an Jesus kõllã onean jerowiwi ko ad, Ej ba “e bwe.” Etke Anij ear maroñ jolok bõd eo an Noa ke ear kadek, im Moses ke ear uror, im David ke ear lõñ? Kõnke Jesus ear ineklok jerowiwi ko aer.
Anij e jab bõk er kõn aer jerbal ñan E im pokake E. Anij ej bõk er kõn an Jesus pinej jenkwaer. Jesus ear “ineklok jerowiwi ko aer.” Im kiiõ bõd ko aer re jako. Eñin unin an Rom 4:8 ba, “E mõnõnõ armej eo Irooj e jãmin watõk jerowiwi ñan e.”
Ak Jesus ej ineklok jerowiwi ko an aolep armej ke? Aolep renaaj mour ilañ ke? Jaab. Rom 5:1 ej ba, “Innãm bwe emõj kowãnõk kõj kõn tõmak, ewor aenõmman ipped ñan Anij kõn ad Irooj Jesus Christ.” Bwe Christ en ineklok jerowiwi ko ad, jej aikuj tõmak bwe ejjelok emman ilo kõj. Jej ri ban (Mt. 11:28). Jerbal an Christ wõt e maroñ lomooren kõj, im e bwe.
Ta eo kwõj lõke ñan kowãnõk eok? Am jar ippãn juon ri kaki im jerbal ñan Anij ke? Men kein re jab medek Anij. Ak kwõj ke tõmak mej eo an Jesus eo ej ineklok bõd ko ad?